Dvalarleyfi vegna vinnudvalar ungs fólks er veitt á grundvelli sérstakra samninga Íslands við erlend ríki. Japan er eina ríkið sem íslensk stjórnvöld hafa gert slíkan samning við til þessa.
Dvalarleyfið er veitt á grundvelli 66. gr. laga um útlendinga nr. 80/2016.
Þú gætir átt rétt á dvalarleyfi vegna vinnudvalar ef öll eftirfarandi skilyrði eru uppfyllt, ásamt fleirum:
- Þú ert ríkisborgari Japan og búsett(ur) þar,
- þú ert á aldursbilinu 18 til 26 ára þegar umsókn er lögð fram,
- tilgangur dvalar er að kynnast Íslandi og menningu landsins,
- þú ætlar ekki að setjast að á landinu,
- þú getur sýnt fram á að þú getir framfleytt þér á dvalartíma,
- þú ert sjúkratryggð(ur) hjá íslensku tryggingafélagi (undir liðnum vátryggingafélög) eða erlendu tryggingafélagi sem hefur starfsleyfi á Íslandi (undir liðnum erlend vátryggingafélög),
- þú hefur ekki afplánað refsingu erlendis á síðustu 5 árum eða verið dæmd(ur) til lengri refsingar en sem samsvarar 3 mánaða fangelsi samkvæmt íslenskum lögum, og
- þú átt vegabréf þar sem gildistími er minnst 90 dagar umfram áætlaðan gildistíma dvalarleyfis.
Þú mátt ekki:
- Koma til landsins áður en dvalarleyfið hefur verið veitt, nema þú þurfir ekki vegabréfsáritun til landsins (en þá má aðeins dveljast 90 daga samfellt á Schengen-svæðinu á sl. 180 daga tímabili),
- áður hafa fengið dvalarleyfi á grundvelli samnings Íslands við erlent ríki,
- fá fjölskyldu þína með þér eða til þín,
- sækja um dvalarleyfi á öðrum grundvelli, nema að yfirgefa landið,
- vera lengur frá landinu en 90 daga á 12 mánaða tímabili á meðan leyfið er í gildi, annars getur dvalarleyfið verið fellt niður eða afturkallað.
Umsókn um dvalarleyfi og önnur fylgigögn skulu lögð fram hjá Útlendingastofnun eða sýslumönnum utan höfuðborgarsvæðisins.
Umsækjandi sem ekki er áritunarskyldur má vera staddur á landinu þegar umsókn er lögð fram og þegar hún er til vinnslu, svo lengi sem samfelld dvöl á Schengen-svæðinu fer ekki yfir 90 daga á sl. 180 daga tímabili. Umsækjandi sem er áritunarskyldur má ekki vera staddur á landinu þegar umsókn er lögð fram. Slíkri umsókn verður synjað.
Ef umsækjandi uppfyllir ekki þessi skilyrði og þau skilyrði sem fjallað er um neðar verður dvalarleyfi synjað og umsækjandi þarf að yfirgefa landið. Yfirgefi umsækjandi ekki landið getur það leitt til brottvísunar og endurkomubanns. Endurkomubann felur í sér bann við endurkomu á Schengen-svæðið um ákveðinn tíma eða að lágmarki 2 ár.
Ekki er heimilt að endurnýja dvalarleyfið.
Nánar um dvalarleyfi vegna vinnudvalar
Réttindi sem fylgja leyfinu
Umsókn um dvalarleyfi
RÉTTINDI SEM FYLGJA LEYFINU
Réttindi sem fylgja dvalarleyfinu eru eftirfarandi:
- Dvalarleyfið er að hámarki veitt til 1 árs. Ekki er heimilt að endurnýja dvalarleyfið.
- Umsækjandi fær óbundið atvinnuleyfi og getur unnið og skipt um vinnu, án þess að sækja um það til Vinnumálastofnunar, meðan á dvölinni stendur.
- Dvalarleyfið veitir ekki rétt til fjölskyldusameiningar.
- Dvalarleyfið getur ekki verið grundvöllur ótímabundins dvalarleyfis.
UMSÓKN UM dvalarLEYFI
Með umsókn skulu fylgja öll þau gögn sem Útlendingastofnun gerir kröfu um til staðfestingar á því að skilyrði dvalarleyfis séu uppfyllt.
Ekki þarf að greiða afgreiðslugjald fyrir umsókn um dvalarleyfi vegna vinnudvalar.
Gögn sem þarf að leggja fram
- Umsókn um dvalarleyfi. (Vinsamlegast hlaðið niður og vistið á tölvu áður en fyllt er út). Í frumriti, vel útfyllt og undirrituð af umsækjanda. Mikilvægt er að umsækjandi greini frá dvalarstað sínum hér á landi. Liggi heimilisfang ekki fyrir þegar umsókn er lögð fram skal umsækjandi leggja fram tilkynningu um dvalarstað innan 2 vikna frá því að umsækjandi kemur til landsins (t.d. við myndatöku).
- Passamynd (35mm x 45mm).
- Ljósrit vegabréfs. Gildistími skal vera minnst 90 dagar umfram gildistíma dvalarleyfis. Ljósrit þarf að vera af persónusíðu og síðu með undirskrift umsækjanda.
- Staðfest frumrit erlends sakavottorðs. Sakavottorð má ekki vera eldra en 6 mánaða. Leggja þarf fram sakavottorð frá öllum þeim löndum þar sem umsækjandi hefur búið síðustu 5 ár. Sakavottorð skal gefið út af æðsta yfirvaldi lands sem heimilt er að gefa út slíkt vottorð. Athugið að krafist er vottunar sakavottorðs, þ.e apostille eða tvöfaldrar keðjustimplunar.
- Staðfest afrit eða frumrit þýðingar löggilts skjalaþýðanda á sakavottorði. Á aðeins við ef erlend vottorð eru á öðru tungumáli en ensku eða Norðurlandamáli. Athugið að krafist er vottunar á þýðinguna sé hún unnin af þýðanda sem ekki hefur fengið löggildingu á Íslandi, þ.e apostille eða tvöfaldrar keðjustimplunar.
- Sjúkrakostnaðartrygging. Umsækjandi þarf að leggja fram staðfestingu tryggingar frá íslensku tryggingafélagi (undir liðnum vátryggingafélög) eða erlendu tryggingafélagi sem hefur starfsleyfi á Íslandi (undir liðnum erlend vátryggingafélög). Tryggingin skal gilda í 6 mánuði frá skráningu umsækjanda í þjóðskrá og vera að lágmarki 2.000.000 kr. Skráning í þjóðskrá miðast að öllu jöfnu við þá dagsetningu sem umsækjandi kemur til myndatöku hjá Útlendingastofnun eða sýslumanni vegna útgáfu dvalarskírteinis, hafi hann dvalið hér á landi samfellt frá því að myndatakan fór fram.
- Framfærslugögn sem staðfesta trygga framfærslu á dvalartíma.
- Farmiði fyrir heimferð eða sönnun þess að umsækjandi hafi fjárráð til að greiða heimför þegar dvöl lýkur.
Gögn sem er heimilt að leggja fram
- Umboð í frumriti vottað af tveimur vottum. Umboð þarf ekki að berast nema umsækjandi vilji að einhver annar en hann sjálfur fái upplýsingar um vinnslu umsóknarinnar hjá Útlendingastofnun.
Það er á ábyrgð umsækjanda að leggja fram nauðsynleg fylgigögn umsóknar. Ef fullnægjandi gögn berast ekki til Útlendingastofnunar með umsókninni getur það leitt til þess að afgreiðsla umsóknar tefjist eða að umsókninni verði synjað. Útlendingastofnun getur óskað eftir viðbótargögnum þegar sérstakar ástæður mæla með því.
Uppfylli umsækjandi öll skilyrði dvalarleyfis verður dvalarleyfið veitt og umsækjanda í framhaldinu send tilkynning um veitinguna. Dvalarleyfið verður þó ekki útgefið fyrr en umsækjandi hefur mætt í myndatöku til Útlendingastofnunar eða sýslumanna utan höfuðborgarsvæðisins, tilkynnt um dvalarstað til Útlendingastofnunar og gengist undir læknisskoðun. Miðað er við að umsækjandi mæti til myndatöku innan við viku frá komu til landsins, og leggi fram tilkynningu um dvalarstað (t.d. við myndatöku) og gangist undir læknisskoðun innan tveggja vikna frá komu til landsins. Útlendingastofnun synjar um útgáfu dvalarleyfis uppfylli umsækjandi ekki ofantalin skilyrði. Það getur leitt til ólögmætrar dvalar og brottvísunar.