Barn fætt eftir 1. júlí 2018 öðlast sjálfkrafa íslenskan ríkisborgararétt við fæðingu, ef foreldri þess er íslenskur ríkisborgari, óháð því hvar það fæðist og óháð hjúskaparstöðu foreldra. Þjóðskrá Íslands sér um skráningu barna sem öðlast sjálfkrafa íslenskt ríkisfang.
Faðir sem er íslenskur ríkisborgari getur óskað eftir því að barn hans fái íslenskan ríkisborgararétt samkvæmt 2. mgr. 2. gr. laga nr. 62/1998, sbr. lög nr. 100/1952, sem öðluðust gildi 1. október 1998.
Eftirfarandi skilyrði gilda:
- Barnið er fætt erlendis milli 1. október 1998 og 1. júlí 2018.
- Barnið á íslenskan föður og erlenda móður sem voru ógift við fæðingu þess.
- Faðir barnsins er með íslenskt ríkisfang.
- Foreldrar hafa ekki gengið í hjúskap eftir fæðingu barnsins.
Afgreiðslugjald
Það athugist að umsókn er ekki tekin til vinnslu fyrr en greiðsla hefur borist. Upplýsingar um afgreiðslugjald og bankaupplýsingar má finna hér.
Nauðsynleg fylgigögn tilkynningar um barn fætt erlendis
Upplýsingar um ‚apostille‘ vottun og tvöfalda staðfestingu, löggilta þýðingu og staðfest afrit má finna hér. Það athugist að ekki þarf vottun á íslensk vottorð, og þýðing þarf eingöngu að fylgja með sé erlent vottorð á öðru tungumáli en ensku eða Norðurlandamáli.
- Gátlisti fyrir tilkynningu um barn fætt erlendis. Vinsamlegast prentið gátlistann út og látið fylgja með umsókn. Merkja skal við þau gögn sem fylgja og þeim raðað í sömu röð og í gátlista.
- Tilkynning um íslenskan ríkisborgararétt fyrir barn fætt erlendis. Í frumriti, vel útfyllt og undirrituð af umsækjanda.
- Staðfest afrit af frumriti fæðingarvottorðs barns. Frumritið skal vera vottað með ‚apostille‘ vottun eða tvöfaldri staðfestingu, og síðan tekið af því staðfest afrit.
- Staðfest afrit eða frumrit þýðingar löggilts skjalaþýðanda á fæðingarvottorði barns.
- Afrit úr vegabréfi föður. Rithandarsýnishorn vegabréfs skal fylgja með.
- Afrit úr vegabréfi móður. Rithandarsýnishorn vegabréfs skal fylgja með.
- Hjúskaparstöðuvottorð móður. Frumritið skal vera vottað með ‚apostille‘ vottun eða tvöfaldri staðfestingu, og síðan tekið af því staðfest afrit.
- Staðfest afrit eða frumrit þýðingar löggilts skjalaþýðanda á hjúskaparstöðuvottorði móður. Á aðeins við ef erlend vottorð eru á öðru tungumáli en ensku eða Norðurlandamáli.
- Skriflegt samþykki móður á umsóknareyðublaði eða frumrit vottaðrar yfirlýsingar hennar um að hún sé samþykk því að barnið öðlist íslenskan ríkisborgararétt. Yfirlýsing móður þarf að vera staðfest af þar til bærum yfirvöldum í heimalandi.
Nánar um rétt barns sem fætt er erlendis og á föður sem er íslenskur ríkisborgari
Barn fætt erlendis í hjúskap föður sem er íslenskur ríkisborgari og móður sem er erlendur ríkisborgari öðlast sjálfkrafa íslenskan ríkisborgararétt þegar feðrun hefur átt sér stað. Þjóðskrá Íslands sér um skráningu barns og íslensks ríkisfangs þess. Það athugist að skilyrði 12. gr. laganna þarf að vera uppfyllt. Sjá nánar hér.
Ef barn er fætt erlendis fyrir þann 1. október 1998 og íslenskur faðir var ekki giftur erlendri móður þess við fæðinguna, og þau hafa ekki gengið í hjúskap síðar, þarf að sækja um íslenskan ríkisborgararétt fyrir barnið. Sjá nánar hér.
Barn fætt erlendis fyrir 1. október 1998 eða eftir 17. apríl 2007, öðlast sjálfkrafa íslenskan ríkisborgararétt þegar faðir sem er íslenskur ríkisborgari og móðir sem er erlendur ríkisborgari hafa gengið í hjúskap. Þetta gildir frá og með hjúskapardegi foreldranna. Það athugist að skilyrði 12. gr. laganna þarf að vera uppfyllt. Sjá nánar hér.